Danke an alle BesucherInnen, freiwilligen HelferInnen und Mitwirkenden, die unseren heurigen Tag der offenen Tür wieder einmal zu einem unvergesslichen und wunderschönen Fest gemacht haben!!!
Der "Lebenslauf" der Sobeges nach einem Gedicht von Elfriede Groß:
15 Jahre Sobeges
Va 10 Leit, auf 74 und nou immer koa bisserl leise,
wir faongen aon va vorn und mochn uns auf die Entstehungsreise.
Da Herr Wolfmayer und einige Eltern hobn sie dahinterglegt und gschaut,
das do im Birkfelderraum a Betreuungszentrum wird baut.
Mit der Unterstützung va 9 Gemeinden und ah va da Raiffeisenkassa,
wird,- noch vielen Anträgen und Telefonaten- des Projekt scha immer klassa.
Des Lokal der Fleischwerke Prettenhofer is gwesn der richtige Raum,
wou´s im April 2001 aongfaongt hot für maonche wor des echt a Traum.
Genau am Gründonnerstog wor für die erstn zehn Leit da Start,
und des Festtogs essn an dem Tog des wor,- gaonz sicher- a Spinat.
„Do wühl ih bleibn“ sou hobn die meistn gsogt,
„ wos kimmb auf mih zua“? des wor ba maonche ah die Frog.
„Du bist wie ausgwechselt“! hobn sih dahoam die Eltern gfreit.
„Orbeitn is guat für mih“ „ Super glass!“, es vergeht die Zeit.
In da Schulungsküche und Werkstott hobns am Aonfaong kocht und gmocht,
für aondere Rosngmaht und Autoputzt es hot a Göld in die Kassa brocht.
Natürlih wor´s dann ehzeit z´kloan drum hobn s´ 2004 wieder gwerkt,
die Kreativ und Holzwerkstott das olln taugt, des hot ma gmerkt.
Vom Laond wurdn 25 Plätze bewilligt des is guat, a glassi Gschicht,
deswegn hobns die Kuchl vergrössert und a neiga Speisesaal wird g´richt.
„Glass das ih kemman kaon“- des toan die meistn sogn,
„owa des früahri aufstehn“ tuat natürlih maonchn Plogn.
„Ih Orbeit am liabstn in da Wirtschoftsgruppn“ „die Nochspeisn moch ih sou gern“,
„mia gfolln die Betreuerinnen“! solche Komplimente tuat ma hörn.
Es werdn Wosch und Sanitärräume baut des is oft 2005 possiert,
und sehr beliebt,- der Snoezelenraum a Platzerl wou nur- Relaxt -wird.
Vüle Händ hobn zaommengholfn klopft und g´schrauft und putzt,
jedn Euro, kaon ma sehn hot ma wirklih passend gnutzt.
Seit 10 Johrn gibs den Mobilen Dienst für Familienentlastung und die Freizeit,
des is Begleitung ah ausserholb- für Lebensqualität, die olli Gfreit.
Va 10 Leit auf jetzt 74 und des mit Elan in 15 Johr,
bei Sobeges steht Stärke, Offenheit , Gemeinschoft und Sinn gebn- davor.
„Mia taugs vull Gas“ sou kaon ma´s do herinnen hörn,
„des Toschngeld is echt glass“ „Kochn und Kreativ mog ih sou gern“.
„Boa, de kinnan wos“ wor scha ouft a ZIVI erstaunt,
wenn gschnittn wird und gschliffn oder oana spült, sein eignen Sound.
2009 wors wieder soweit die betreutn Mitarbeiter werdn immer mehr
, glass wär a Bewegungs und Projektraum, und a Büro g´hört a nou her.
Auffi in den erstn Stock wieder wird plant und baut,
2012 hot für a Entspannungs- und Fördergruppe a nou a Platzl aussagschaut.
Ohne des Küchnteam der Sobeges hättn die meistn Schüler koa Jausn,
das Borg, Poly, Neue Mittelschule wird mit Essn versorgt in da Pausn.
Für die jungen Pupperl- gibs a Supperl,
die Süssn vor Ort,- werdn mit Möhlspeis versorgt,
mit a Pizza a gsundn,- kemmans grot üba d´Rundn, u
nd in da Volksschul wissns gwiss,- wos a G´sunde Jausn is.
Es gib scha a Auszeichnung für des guati Essn, do toan die Schüler sogor auf den Mc Donald vergessn.
Jetzt gibs für 28 Leit die Bewilligung wos betreut werdn und begleitet,
die Ernst gnommen und unterstützt a jeder, sein Lebensweg bestreitet.
Es gib do Herinn souvül Sochn de a Aussnstehender net siacht,
wia gorbeit, gmocht, und glernt wird- ah maonchmol, a kloans Wunder gschiacht.
Zaommenholt und Wertschätzung die Schwächern werdn mit Stärk´re gmischt,
mit Gfühl, Geduld und Miteinaonder wird glocht, und maonchmol Tränen gwischt.
Zum Schluss nou da Text vom Sobegesliad mit dem ols g´sogte zaommgfosst wird:
Es is die Lebenslust und s´Herz wos s´ bringen olle mit,
a jeder wird bei Sobeges begleitet Schritt für Schritt.
Es wird dem Augenblick a grosse Chance gebn,
Gemeinschaft trog sie olle do zuversichtlich durch des Lebn.
Und hiatz wird taonzt und gfeiert weil des können s´ah guat,
a jeder singt laut mit, und mocht,- wos da Nochbar tuat!
